Онаа народната „Ќе се откажам од тебе преку весник“, оваа брачна двојка ја спроведе на дело
Како вистинска сензација во регионалните медиуми пред три години одекна приказната на Крунослава и Фрањо Шимповиќ кога одлучија јавно, преку весник, да се откажат од својот, во тоа време, 45-годишен син.
Четири години ги немал посетено, а исто толку време си ги немале видено ниту внуците.
„Јавно се откажуваме од нашиот син, но и од нашата снаа. За нас, едноставно повеќе не постојат. Ќе направиме се’ и правно да биде „избришан“ како наш син“, порачаа тие.
Во таа прилика раскажаа дека од мали нозе му овозможувале се’ што ќе посакал, а неговото неподносливо однесување кон нив почнало уште во студентските денови.
„Уште тогаш не бираше зборови, особено кон мене. Бевме добри за него само кога му праќавме пари, а односот дополнително се влоши кога се ожени. Првите три години нашата снаа беше добра, а потоа преку ноќ се’ се промени. Секој телефонски повик завршуваше со тешки навреди и ни забрани да ги гледаме внуците“, раскажа Крунослава.
Таа и нејзинот сопруг особено се налутиле кога синот и снаата им рекле на децата дека нивните баба и дедо живеат во Америка.
„Скршени сме. Не ни остана ништо друго, освен да се откажеме од нив и преку весник“, порача Фрањо.
Нивниот син не сакаше да го коментира овој потег на родителите.
„Мене ова ми е смешно, секој дополнителен коментар е непотребен“, кратко изјави тој.
Фото: Никола Волф/Подравски.хр
