Утре треба да се одржи состанок на Советот за безбедност. Ние ќе побараме продолжување на вонредната состојба од повеќе причини за да имаме механизми во однос на имплемантацијата на вакви препораки и во периодот кој што следи, рече денеска министерот за здравство, Венко Филипче.
Тој не прецизираше дали ќе биде побарано продолжување на вонредната состојба за нови 30 денови или помалку.
-Потребно ни е да се продолжи вонредната состојба затоа што дел од мерките важат само за време на вонредна состојба. Многу е битно тие да важат и натаму. Многу е битно да имаме инструменти во рацете да работиме со овие механизми, во однос на рестрикција на движење, уредбите кои важат и така натаму. Потребни ни се инструменти со кои препораките на Комисијата за заразни болести ќе можат да се имплементираат преку Владата – рече тој.
Вонредната состојба што ја прогласи претседателот Стево Пендаровски истекува во сабота.
