Конечно се огласи мајката на Ана Волш, 39-годишната Србинка, инаку мајка на три сина, која исчезна на новогодишната ноќ.
Миланка Љубичиќ им ги покажа на медиумите последните пораки кои ги разменила со својата ќерка непосредно пред да ѝ се изгуби секаква трага во Кохасет, Масачусетс.
Таа вели дека се’ уште не може да поверува дека Брајан ја убил нејзината ќерка и се надева дека Ана е жива и дека ќе се појави.
На 25 декември Ана ѝ испратила порака на мајка си во која ја прашува дали следниот ден може да се најдат во Вашингтон.
Мајка ѝ ја прашала зошто ова ѝ го најавува сега „во пет до дванаесет“, на што таа ѝ одговорила дека со сопругот Брајан не се во добри односи и дека конфликтот им бил воглавно за децата.
Разговорот подоцна тече вака:
Миланка: „Можеби ќе можам за седум дена. Морам да земам и лекови. Не знам колку би останала“.
Ана: „Утре. Те молам. На два месеци“.
Миланка: „Во колку часот е летот?“.
Ана: „7 или 13:30…“
Инаку, Ана Волш исчезна ноќта помеѓу 31 декември и 1 јануари. Нејзиниот сопруг Брајан ја пријавил како исчезната дури три дена подоцна. Истрагата покажала дека ја попречувал истрагата, а во подрумот од куќата биле пронајдени траги од крв и крвав нож. Исто така, на депонијата биле пронајдени крвави партали и тепих, а американската полиција се сомнева во најлошото сценарио.
Дваесет дена по исчезнувањето на Ана, Брајан Волш е обвинет за убиство, а според последните информации полицијата се сомнева дека ја распарчил во подрумот. Тој веќе е во притвор под обвинение дека ја измамил полицијата.
Во меѓувреме, порталот „Бостон 25“ потсети дека во 2014 година Ана пријавила дека Брајан ѝ се заканувал дека ќе ја убие, иако потоа се омажила за него, а во 2018 година објавила слика со модринка на нејзиното лице што можеби зборува за насилната природа на нејзиниот сопруг.
* Текстот не смее да биде преземан без дозвола на редакцијата на МАСТИЛО
