На 52-годишна возраст почина познатиот српски стилист и креатор Саша Видиќ.
Според последните информации на тамошните медиуми, човекот кој соработуваше со најзвучните естрадни имиња бил хоспитализиран во многу лоша состојба. Имал почетна фаза на сепса и едноставно му немало спас, пишува „Пинк“.
Видиќ ги осмисли и ги дизајнира дресовите на српските спортисти на Олимпијадата во Лондон, а ги потпиша и дресовите на српската фудбалска репрезентација за Светското првенство во Русија. Беше основач на модниот бренд „Броз“.
Роден е 1971 година во Хрватска, едно време живееше во Бања Лука, за потоа да се пресели во Белград по избувнувањето на војната во Босна.
Соработуваше со Цеца, Сека Алексиќ и со Дара Бубамара, но со текот на времето овие музички ѕвезди од блиски соработнички му станаа главни непријателки кои често ги прозиваше во таблоидите.
Важеше за интригантна личност која немаше влакна на јазикот и отворено зборуваше на секоја тема. Во јавноста многу се полемизираше за неговата се*суална ориентација, а оваа тема беше една од ретките на која немаше коментар. Своевремено изјави дека не ги разбира луѓето кои се плашат од осаменост.
