На 55-годишна возраст вчера ненадејно почина Илија Хаџи-Мојсов, долгогодишен физеотерапевт на фудбалскиот клуб „Беласица“, вработен во Клиничката болница во Штип.
„Имаше магична моќ во рацете“, пишува администраторот на фејсбук-страницата „Штипски асови“.
Неговите сограѓани велат дека бил почитуван професионален масер кој помогнал многу спортисти, но и други пациенти побрзо да ги залечат повредите. Ќе го паметат како човек секогаш расположен за разговор, „одговорен“ за забава и веселби во друштвото.
„Бев другар со Иле. До последен ден се дружевме. Беше пријатен, секогаш насмеан и весел. Знаеше и да запее. Беше и боемчина. Многу болно ја примив веста дека повеќе нема да го видам мојот голем другар, ИЛЕ. Секогаш ќе се сеќавам на него, на неговите добри работи што ги правеше на сите спортисти, и не само на нив. Знаеше да помогне и по полноќ, да спаси некој човечки живот Никогаш нема да го заборавам ова хумано момче“, вели познатиот спортски работник Ване Хубрев.